Jóhann Páll Jóhannsson þingmaður Samfylkingarinnar fer yfir, hvernig nýútsprunginn orkumálaráðherra hefur tekið afstöðu til orkumála.
Í ljós kemur að Guðlaugur hefur sprungið vel út, enda vor í lofti þrátt fyrir næturfrost flesta daga en kannski lýsir það einmitt stöðunni í vandræðastjórninni sem nú situr, eftir að forsætisráðherra þeirrar fyrri, ákvað að reyna að stytta titilinn um nokkur atkvæði.
Guðlaugur telur Samfylkinguna ábyrga fyrir aðgerðaleysi undanfarinna ára hvað varðar orkumálin en við athugun Jóhanns Páls kemur ýmislegt fróðlegt í ljós.
a) ,,Frá því að samsteypustjórn Sjálfstæðisflokks, Framsóknar og Vinstri grænna tók til starfa haustið 2017 hafa ekki hafist framkvæmdir við neina nýja virkjun með uppsett rafafl 10 MW eða meira og ekkert gilt virkjunarleyfi verið gefið út vegna nýrrar virkjunar.“
b) ,,Á tímabilinu 2010 til 2020 risu þrjár virkjanir á Íslandi yfir 10 MW: Búðarhálsvirkjun, Þeistareykjavirkjun og Búrfellsvirkjun II. Búðarhálsvirkjun var fjármögnuð og reist á vakt Samfylkingarinnar í ríkisstjórn. Þeistareykjavirkjun var áherslumál þáverandi iðnaðarráðherra Samfylkingar og sett í nýtingarflokk rammaáætlunar í stjórnartíð Samfylkingar árið 2013. Þingflokkur Samfylkingarinnar studdi frumvarp um aflaukningu virkjana sem þegar eru í rekstri árið 2022 og stærstu orkuöflunarverkefnin sem nú eru á dagskrá, Hvammsvirkjun og Búrfellslundur, rötuðu í nýtingarflokk rammaáætlunar með stuðningi Samfylkingar.“
c) ,,Það hlægilega við þessa gagnrýni ráðherra er að sjálfur sat hann ekki bara hjá heldur greiddi beinlínis atkvæði gegn rammaáætlun árið 2013 þegar 16 virkjunarkostir voru settir í orkunýtingarflokk, m.a. Þeistareykjavirkjun, og Hvalárvirkjun og jarðhitavirkjun í Krýsuvík sem hann klappar núna upp. Ef allir þingmenn hefðu greitt atkvæði eins og Guðlaugur Þór væri staðan í orkuöflunarmálum þannig enn lakari en hún er í dag.“
d) ,,Í nýju stefnuplaggi Samfylkingar sem ber yfirskriftina Krafa um árangur setjum við fram raunhæfa áætlun um að koma skikk á þennan málaflokk og skapa jafnvægi milli orkunýtingar og náttúruverndar. Við teljum að unnt sé að auka ársframleiðslu á raforku um 5 terawattstundir á næstu 10 árum.“
e) ,,Við [Samfylkingin] leggjum m.a. til að stofnanir verði skyldaðar til að setja í forgang umsóknir vegna virkjunarkosta sem settir hafa verið í nýtingarflokk rammaáætlunar, að tímafrestir verði festir í lög, innheimt verði þjónustugjöld af framkvæmdaaðilum og að komið verði upp einu samþættu leyfisveitingaferli í stafrænni gagnagátt hjá nýrri Umhverfis- og orkustofnun. Allt eru þetta lykilatriði til að binda enda á áralangt framtaksleysi í orkumálum.“
Það er aumt þegar þeir, sem setið hafa í ríkisstjórn árum saman og látið tímann líða í ráðleysi og draumórum, setjast síðan í valdastóla og kenna flokki úr sjórnarandstöðunni um sitt eigin slugs og sofandahátt.
En þjóð veit þá tveir vita og við vitum öll, hverjir hafa þóst vera að stjórna landinu undanfarin ár og þótt forystusauðurinn sé horfinn úr hjörðinni og leiti að grænna grasi annarsstaðar, hefur í rauninni ekkert annað breyst en að menn hafa skipt um stóla og einn nýliði er að máta sig í einum ráðherrastólnum.
Færðu inn athugasemd