Geimfar hefur ráfað um heiminn en stefnir orðið þangað sem það kom frá, það er að segja til Jarðarinnar.

Þótt ég  langförull legði…

Allt er það vont og verra en verst – sagði karlinn

Zelensky er í fýlu og hafnar þriggja daga vopnahléi, geimfar sem átti að fara til Venusar fyrir langa löngu er á leiðinni til Jarðar en enginn veit nákvæmlega hvar eða hvenær það mun lenda.

Heimildin sagði frá þessu fyrir skömmu og líklega er best að halda sig a.m.k. í grennd við loftvarnarbirgi til að vera öruggur!

Myndin tengist efninu ekki á nokkurn hátt en fær að fylgja með vegna persónunnar til hægri, sem er allt í öllu þessa dagana. Sú til vinstri er frá liðnum tíma, sem við skulum vona að aldrei verði endurvakinn.

Verst af öllu er þó, að veðurfræðingar eru farnir til annarra starfa í USA, eða í langþráða hvíld og ætli það sé  ekki Trump að kenna, eins og flest þar vestur frá þessa dagana.

Hvers vegna úkraínski Zele fór í óstuð er ekki gott að segja en á honum er svo að skilja, sem þriggja daga hlé á manndrápum sé ekki nógu markviss aðgerð á óvissutímum.

Fer þá að verða vandséð hvernig  koma á mönnum að samningaborði ef ekki má taka sér eins og svo sem helgarpásu í manndrápum, til að reyna að þoka málum í skárri farveg.

Auk alls þessa er víst veðrið að angra þá fyrir vestan sem vonlegt er, þegar enginn er til að hafa stjórn á því; veðurfræðingar vestur þar munu vera komnir í einhverskonar verkfall en það gerir veðrið ekki svo vitað sé.

Varðandi geimfarið heimakæra og heimfúsa, sem átti að fara til Venusar fyrir löngu síðan er það að segja, að minningar kveikna frá fyrri tíma (geimfarið er frá fyrri tíma!), um geimfar sem sent var til  ástarplánetunnar, sveif niður á yfirborðið í fallhlífum og sendi upplýsingar til Jarðar.

Það mun hafa verið Sovéskt eins og það hét þá, en þetta geimfar sem nú er til umræðu, vildi ekki lúta ráðstjórn og er á heimleið en samt ekki endilega þangað sem því var skotið frá í upphafi, því það ætlar sér til Jarðar og gerir ekki mun á bláu og rauðu, né öðrum litum þar á milli, þegar það velur sér lendingarstað.

Það mun bara lenda einhverstaðar!

Ástarstjarnan reyndist ekki spennandi staður til að vera á af ýmsum ástæðum, sem ekki verða taldar upp að öðru leiti en því, að útsýnið á ástarstjörnunni reyndist ekki vera upp á það besta og andrúmsloftið ekki  heldur.