Grunnurinn, skaginn, ósóminn og fundurinn

Úr grunni hins nýja Landsspítala kemur upp grjót og unnið er hörðum höndum að því að fjarlægja það, en vegna þess að sífellt vantar meira og betra húsnæði fyrir íslenska alþingismenn, þá er verið að byggja hús yfir þá og það verður þakið grjótinu sem kemur upp úr grunni spítalans.

Ekki fylgir sögunni hvort þingmenn muni þar með berja höfðinu við steininn, en líklega þarf ekki að taka það fram, því þeir geta alla vega gert það í bókstaflegri merkingu eftir þessar tilfæringar.

Þetta er, eins og hver maður sér, gríðarlega hagkvæmt og eftir því gott, en ekki grunaði strákgutta sem alinn var upp í miðbæ Reykjavíkur, að miðbærinn yrði með tímanum þakinn húsum sem þjónuðu hinum háttsettu þingmönnum þjóðarinnar.

Vandamálið

Í Morgunblaðinu rekumst við á frétt sem prýdd er mynd af hinum skreflanga Stoltenberg og eins og geta mátti nærri, er hann búinn að finna nýtt vandamál til að þusa um, en lítið er við þvi er að segja, því þus er hans lifibrauð og eitthvað verður maðurinn að iðja.

Það þarf varla að taka það fram, að Rússar eru vandamálið sem sá stolti maður telur okkur þurfa að glíma við og gott til þess að vita að allt er eins og venjulega.

Ósóminn

Hún er dálítið bitastæðari aðsenda greinin eftir Jón Steinar Gunnlaugsson lögmann sem skrifar um bruðlið sem er í gangi varðandi Hæstarétt, en að sögn Jóns eru dómararnir í réttinum tveimur of margir eftir að búinn var til ,,Landsréttur“.

Tilurð þess dómsstigs átti að verða til að létta álagi af Hæstarétti. Álagið minnkaði en rétturinn ekki og þar stendur hnífurinn í kúnni ef svo má segja: Þ.e.a.s. að í réttinum eru tveir dómarar sem ekkert hafa að gera, nema að taka við laununum sínum úr ríkissjóði.

Ríkisstjórninn bauð upp á húllumhæ í Hörpu, byssukaup, jakkafatakaup og bíla auk ferðasjúkrahúss sem gera má ráð fyrir að sé komið til Úkraínu til Selenskís, en hann er einmitt einn helsti ráðgjafi Stoltenbergs varðandi þjóðirnar á Balkanskaga o.fl. Byssukaupin kostuðu 165 milljónir, jakkafötin slatta og sjúkrahúsið og bílarnir helling, en verðmat ráðherranna í ríkisstjórninni fer að mestu fram í einingunum slatti og hellingur.

Niðurstaðan og það sem mun liggja fyrir á næstu vikum

Við sjáum hvernig þetta allt saman var, nema að sumt vantar s.s. bílana og hjólasjúkrahúsið, ferðakostnað til Selenskís o.fl.

Við sjáum hér að ofan að þingmaður Miðflokksins spurðist fyrir um ráðstöfun fjárs vegna fundarins og ekki stóð á svarinu: Það mun liggja fyrir á næstu vikum!

Hvenær þær teljast liðnar og öll kurlin verða komin til grafar vitum við ekki og kemur líklega ekki við.

Við endum svo þetta miðlaflakk á auglýsingu úr Bændablaðinu, sem við vonum að borið hafi árangur, þó ekki væri nema foreldranna vegna!

Auglýsingin góða.